Har haftaning payshanba kuni – Yoshlar kuni. Universitet rahbariyati uchun bu kun talabalar bilan bevosita muloqot qilish, ularning muammo va takliflarini o‘rganishning an’anaviy kuniga aylangan. Shu kuni universitet rektori

M.Xolmuxamedov Talabalar turar joyida yashovchi yoshlar bilan uchrashib, ularning yashash sharoitlari, o‘qish va bo‘sh vaqtlarini mazmunli tashkil etish bilan yaqindan tanishdi.

Rektor tashrifi davomida turar joyda sport bilan shug‘ullanish, dam olishni samarali tashkil qilish uchun yaratilgan imkoniyatlarni ko‘zdan kechirdi. Yoshlar bilan suhbatda u yaqin kunlarda sport mashg‘ulotlarini yo‘lga qo‘yish, tennis, shaxmat va shashka o‘ynash uchun maxsus yopiq maydon tashkil etish, shuningdek, turar joy oldida zamonaviy vorkaut zonasini barpo qilish rejalari haqida gapirdi.

Bundan tashqari, talabalar orasida kompyuter savodxonligi va xorijiy tillarni bilish darajasida muayyan qiyinchiliklarga duch kelayotgan yoshlar qo‘llab-quvvatlanib, ular universitet tomonidan bepul o‘qitilishi yo‘lga qo‘yilishi bo‘yicha aniq chora-tadbirlar belgilab berildi.

Uchrashuv davomida talabalar ham o‘z taklif va tashabbuslarini bildirib, yashash va o‘qish jarayonini yanada takomillashtirish yuzasidan qator g‘oyalarni ilgari surdi. Rektor tomonidan har bir taklif diqqat bilan eshitilib, ularni amalga oshirish bo‘yicha tegishli ko‘rsatmalar berildi.