12-noyabr kuni 2-bosqich magistratura talabalari restoranlarni avtomatlashtirish bo'yicha mutaxassis Xurshed Xodjiyev tomonidan o'tkazilgan amaliy mashg'ulotda ishtirok etdilar. Amaliy dars "R_keeper" tizimiga bag'ishlangan bo'lib, u restoranlarda an'anaviy boshqarish usullaridan zamonaviy  boshqarish tarziga o'tishga yordam beradi.

R_keeper – UCS kompaniyasining savdo belgisi bo’lib, uning ostida restoranlarni avtomatlashtirish uchun mo'ljallangan dasturiy ta'minot vositalari hamda dasturiy komplekslar sotiladi.

X.Xojiyev talabalarga ushbu dastur yaratilishining tarixi haqida qisqacha so'zlab, uning nafaqat restoran egalari, balki xodimlar uchun ham afzalliklarga ega ekanligini ta’kidladi. "Yaxshi boshqaruv xizmat ko'rsatish sifatini oshirishi mumkin, shuningdek, mehmonlar xotirasida unutilmas taassurot qoldiradi va shuning uchun egalarining yuqori savdo ko'rsatkichlarini ta'minlaydi",- dedi mehmon.

Ma'ruzani yanada interaktiv qilish uchun talabalarga restoran rejasi aks etgan slaydlar ko'rsatildi, shuningdek, kassa, RK boshqaruvi, omborxona va boshqalar haqida ma'lumot berildi. Talabalar ham mavzu yuzasidan o’z tajribalari hamda fikrlari bilan bo’lishishdi. Ofitsiantlar roli haqida munozara bo’lib o’tdi. Nutqi davomida mehmon Rossiyada bosh oshpaz sifatidagi shaxsiy tajribasi haqida gapirib o’tdi. Shuningdek, Samarqanddagi eng keng tarqalgan muammolar, restoranlar haqida so'z yuritildi.

X.Xodjiyev talabalarni R_keeper interfeysi bilan tanishtirdi, shuning uchun talabalar nazariyadan amaliyotga o'tishdi. Amaliy mashg'ulotlar davomida ushbu sohada hech qachon ishlamagan ko'plab talabalar o'z fikrlarini o'zgartirib, oziq-ovqat mahsulotlarini tashkil etish mehmondo'stlik va boshqaruvning murakkab tizimi ekanligiga ishonch hosil qilishdi.