Kutubxonamizning Turkologiya va turkiy tillarga oid bo'limi fondi yangi kitoblar bilan to'ldirildi. Turkiya Respublikasining mamlakatimizdagi Favqulodda va muxtor elchisi janob Erol Olgan yaqinda Samarqandga qilgan tashrifida universitetimizning Birinchi Prorektori, turkolog-olim prof. Jo'liboy Eltazarovga bir nechta turkiy tilga oid lug'atlar, bibliografik ko'rsatkichlar bilan qatorda O'zbekistan Respublikasi Prezidenti Sh.M.Mirziyoyevning ''Yangi O'zbekiston'' kitobining turk tilidagi nashrini topshirgan edi.
Birinchi Prorektorimiz bu kitoblar jamlanmasini, shuningdek o'z kutubxonasidan bir nechta dissertatsiya va avtoreferatlarni sovg’a qildi.
Quyida kutubxonamizga kelib tushgan ushbu kitoblar haqida qisqacha ma'lumot beramiz:
- Şevket Mirziyayev. Yeni Özbekistan geleceği büyük devlet.Şahlanan Özbekistan; köklü tarih, aydınlık gelecek. T.C. Kültür ve Turizm Bakanlığı. -İstanbul, 2020. Bu kitobga muhtaram Presidentimizning keyingi yillarda Oliy Majlisga qilgan Murojaatnomalari, respublikamiz parlamenti Palatalarida so'zlagan nutqlari, xalqaro uchrashuvlar, shu jumladan, Turkiy Kengash va Turkiy Davlatlar Tashkilotlari sammitlaridagi chiqishlari matnlari kiritilgan ushbu kitob Turk jamoatchiligi va kitobxonlariga mamlakatimizda davom etayotgan islohotlar, yangilanish hamda yuksalish jarayonlari haqida to'laqonli tasavvur beradi. Kitobga Turkiya Respublikasi Prezidenti R.T.Erdoğan so'zboshi yozgan.
- Türkiye dışındaki Türkler bibliografiyasi. I-II.cilt. Bu ikki cildli kitob 1992-yilda nash etilgan bo'lsa-da hanuzgacha o'z ilmiy qiymatini yo'qotmagan. Bu nodir bibliografik manbada Turkiya Respublikasidan tashqarida - Yoqutiston Respublikasidan Bolqon yarimoroligacha, Volga-Ural sohasidan Hindikushgacha, Turkiston, Sharqiy Turkiston, Qrim, Yevropada yashaydigan turkiy xalqlarning tili, adabiyoti, tarixi, madaniyati, san'ati, etnografiyasi, matbuoti haqidagi 10848 manbalar ro'yxati keltirilgan.
Turk olimlarining qariyb 30 yillik tadqiqotlari samamrasi bo'lgan bu ikki cildli asar Turkologiyaning turli yo'nalishlarda tekshirishlar olib borayotgan olim, mutaxassis va izlanuvchilarga katta yordam beradi. Bunday kitobning universitetimiz kutubxonasi fondidan joy olishi quvonarli hodisa, albatta. Ushbu nodir kitoblarni kutubxonamizga sovg'a qilgan muhtaram Turkiya Respublikasi Elchisi Olgan Bekar janoblariga universitetimiz jamoasi nomidan minnatdorchilik bildiramiz.
